يا شين علماً تسمعته بسمّاعـه=ما هوب مفرح و لا خارج عن السنًّه
لكن خلاّ فوادي يصفق اضلاعه=من راس رمحاً طعني صحت بالونُّه
و أبويه اللي عليه الكبد ملـتـاعه=يـا الله يا الله عـسـى مسكانه الجــنُّــه
مرحوم يا كاسب الطولات بذراعه=عندي عليها شـهـود ولا بهــا مـنُّـه
ومرحوم يا ناشي دمه على الطاعه =يفرح ليا أوحا الجرس فالباب له رنًّه
يمناه لــلـخـيـر بنـايـــه وزرّاعـــه =ماتزرع يديه بـالـتالـي يحـصـدنُّـه
ويمـنـاه فـي مدهـا ما هيب مناعــه =وكفوفه البٍيض ماتنقص يـزيـدنًّــه
والنفس في جودها ما هيب خدّاعه=والشًّر في خاطره للـناس ماكـنُّـه
ساس الكرم والوفا من سيرة أطـبـاعه = البٍيض تضفي على أبويه ويكسنُّه
وأرجى عسى جنه الفردوس مرباعه=والحور فالمنزل العـالـي ينادنًّـه
والحر معروف نظراته وميقاعه=والشيخ له منزلٍ في عالي القِنًّه
والنفس من ربها مـا هـيب جـزاعـه=وأرواحنا مـا عطاها الرب يرضنُّه
والعين في حـزة الأحزان دمّاعه =والله ما واخذ عيوني في بكاهنُّه
يا شين فرق العزيز وما أصعب الرّاعه= صحيح سود الليالي القلب يفجنُّه
لعـل قـبـره عـلـيـه يـهـب ذعـذاعـه =وأطلب من الله مزون الصيف يسقنُّه
يا الله لعل المطر يمطر على قاعه= والأرض تخضر والأزهار يرونُّه