حنت أبكار المدايح في فلا عوج المحاني=الفلا اللي فيض ماها يروي الطرش العطيش
ياجماعة ركدوني لاأرتفع صوتي تراني=عبدليٍ والعبادل حزة الفزعة تطيش
والله إنك لوتشوف جنون شعري لاغشاني=ماتريّح في مكان وتسمع لراسي نشيش
بيض الله وجه إبن عمٍ من الطاري دعاني=يوم قالو لي ترقّى قلت للي قال عيش
في تجمّاع الرجال اللي على عزٍ وشاني=وش يعذرني من الوقفات قلي بس ويش
والله ليبشر بها وأخذ الحقايق من لساني=وإن بديت بكلمة أبشر ماأنتهيت بمعليش
ياحفيد معربين الجد من طول الزماني=جيتك وعرش المعزة من ذهب ماهو عريش
جيتك احمل لك معاني كل ربعي وإمتناني=للمليك اللي وثق بك دون كيف ودون ليش
والله إنا روس قومٍ مانخون ولانداني=واحدٍ ياطا على أرض الوطن مقدار ريش
ياوطنا ياوطنا دونك طوال اليماني=والله إنا لاسمعنا لك نداء روسٍ تشيش
ويامليك الشعب بمرك كلنا قاصي وداني =والشهادة في سباق الموت ماتبغى دقيش
ول يالحوثي عليك اللعنة اللي من ضماني=لو لحقها ابو جهل هلل وكبر في قريش
قر لارحمّك ربي لعنبو هالسيفهاني=لابسة لبس النساء اللي لاتنش ولاتهيش
والله إنك لوتبين من ورى الحد اليماني=لو أوايلنا جنايز تمسك وتفرش فريش
كم حديت الهاجس اللي عن سوى الطيب حداني=قافلٍ مدح الردي في ضومنة شعري بشيش
المدايح عز للرجال ماهي للهداني=والذيابة والنمورة ماتجي مثل الكديش
وعقّب اللي عشرهم لاصمّلت ترجع ثماني=يوم ولْد اللاش ازرى في زمانة لايعيش
ياجماعة أعذروني لا أرتفع صوتي تراني=عبدليٍ والعبادل حزة الفزعة تطيش
في نهايتها إنتمائي مايقلل من كياني=العهد لـ/ آل السعود.. وعزوة مطير الدويش