رفْرَف عَلمنا فالشوارع والأحياء=هبايب البشرى قبل جيته جات
جابت لنا البسمة وهو مابعد جاء=وش لون لاجاء من تغرّب عن الذات؟
شفت الديار اليوم تلبس لها رداء=من شوقها اللي قطّع القلب لهفاات
تهتف لبو متعب طهورٍ من الداء=من شعبه اللي رددو له سلامات
متى على الله يْطْفِي النار بالماء؟=نار إشتياق مشاهده فالمطارات
والله لبكي لجيته ماهو "برياء"=دمع الحزين اللي صدمته المسرات
ياسيدي بَعدك ترى حزن الأجواء=خيّم على دار الكرم والمروات
حتى تساوت في دواخلنا الأهواء=حزنٍ وشوق ودمعتينٍ ودعوات
يادارنا لصوتٍ لفى رد الأصداء=لعيون أبو متعب تغني بالأبيات
أحزن من اللي في وكالات الأنباء=وأفرح ليا شفت العلَم فالمسارات
وين المليك اللي ملك قلب الأعداء؟=بطيبه وبطشة زعيم الحكومات
مشتاق له شوق وصل كل الأنحاء=شوقٍ دخل فالبسلمة والتحيات
متى يلوح كفه؟ لشعبٍ فداء=كفٍ يلوح به جزيل الكرامات
يافرحة الدار العزيزة بالإصغاء=لحظة وصولٍ تْنْطق الصمت كلمات
كلمات تعبير "لفرح" عند الإملاء=ماإحدٍ بكاتبها من الشعب هيهات
بسمي وبسم الشعب كله بلا أسماء=نرفع لك من أسمى التباريك الآيات
عمرك طويل ودوم طاهر من الداء=ياوالد الشعب السعودي سلامات