بديت باسم مصرف الكون تصريف=اللي بسط سبع وسبعٍ رفعها
الخافض الرافع وسيع المحاريف= لو تمشي النملة رويدا سمعها
ابذكر المولى تراديد و اخيف = أخاف من ناره ولاهب ولعها
وخلاف ذاه أنظم جوابٍ على الكيف = قصيدةٍ يطرب لها من سمعها
قاف يشرف صاحب الذوق تشريف= من قو معناها وخفة سجعها
موجهه لأهل القلوب المواليف = كل القروم اللي قويٍ جزعها
ربعي ذوي مضحي قروم عواريف = وراع العلوم الناقصة ما وشعها
الله يجنبهم جميع الصواديف = ويحفظهم بحفظة ويامن روعها
لهم غلا عندي من السيف للسيف = مهما تجي من هرجةٍ ما استمعها
ياما سمعنا من علومٍ محاييف= واسكت واخلي سبلها ما اتبعها
والله ما نرضى عليهم تخاليف = واليا شفتهم نفسي تزايد شبعها
هم ريفي المطلوب وانا لهم ريف = ربيع نفسي عيدها منتفعها
ريف الخوي والجار والثالث الضيف = وعوق الخصيم اليا اعترض في سنعها
وجدي على ربعٍ لحاهم مكاتيف = راحوا وهم ما فرقوا مجتمعها
خذتهم الدنيا بروس الخطاطيف = ياليت ربي عن ربوعي منعها
نصيحةٍ يا أهل القلوب المساييف = اللي غرور انفوسها ما نفعها
لا تشقرون عصيكم يا الملاقيف = من هو شقر عصاه كنه جبعها
لابد ما تطري عليكم تحاسيف = واللي قطع يمناه يونس وجعها
وتعودون الى بعضكم مناكيف = واللي وفي نفسه حاجة يبتلعها
وياللي تبالك سايرما بعد شيف =غروك ناسٍٍ ضيقوا متسعها
ما به غناة عن ذرى البيت يا حيف = يدفيك في ليلة قويٍ لسعها
هذي نصيحة ما تكلف تكاليف= إن شيت تا خذها وان ما شيت دعها
وإعداد وبالٍ مزونة مراديف =سيله جميع أشجارها يقتلعها
صلوا عدد ما هل من وابل الصيف = على رسولٍ سنة نتبعها