السلام عليكم يا أنقياء القلوب...

جديدي أضعه هنا .. عسى أن يرتقي لجزءٍ من ذائقتكم...


تـــمــــاديـــتـــي

تماديتي بصدّك مـا دريتـي وش ورى الصـده=تـظـنين الغـلا يـزداد لا مـنـِّك هجرتيـنـي
لك الله ما وقف قلبي علـى طاريـك لـه مـدّه=ترى صفحتك مطوية مثل مـا انتـي طويتينـي
لأنـِّك فـي مضاميـن الهـوى والعشـق.. مرتـدة=كفرتي عشقي الصـادق .. ودون أسبـاب بعتينـي
وش أنتي لجل أسجّ الفكر في طاريك و امـده..؟=وش أنتي لو ذكرتيني ..؟ وش أنتي لو نسيتيني..؟
أشوف الوقت من بعد الرخا حـدِّك علـى الشـده=بعد ما خانك اللـي لجـل عينـه يـوم خنتينـي
رجعتي.. والحـزن وجـهٍ تبلـل دمعتـه خـده=تسيـل وتنتظـر منـي تجيهـا لمسـة يديـنـي
تعبت أرخي بحبل الوصل لجلِك وارجـع اشـده=تعبت من الكلام اللـي حصـل ما بينـِك وبينـي
تقوليـن الوفـى رجـال ما قـد مـد لـك يـده=واقول ان الوفى رجال مـن صغـري مخاوينـي
نسيتـي يـوم طعنـات القفيـا منـك مشـتـده..؟=أنا وشلون أبنسى الخنجـر اللـي بـه طعنتينـي
رجعتي ترتجيـن أرجـع علـى ماضيـك وأرده=تبين أتعب.؟ تبين أشقى.؟ تبين الهم يطوينـي..؟
ترى نفسي عن وصالِك يا بنـت النـاس منلـده=حشـى لله مـا ارد الخطـى لـدربٍ يعنيـنـي
يقولون العرب "هـرجٍ يجـر إلـك الحيـاء بـده"=وأنا رجـال لـي مبـدأ ولا أغيـر مضامينـي
إذا عشقي افتخرتي بـه قبـل لا تعلنـي الصـده=أنـا أكبـر إهانـة لـي "يـوم إنـك عشقتينـي"

،’،


وسلامتكم


،’،


محبكم/ عادل الدويحاني