عزالله إني لبعد الناس محتاجي=الحال معوّجْ والعربان معوجة
إبعد عن الأرض لامن صرت هجاجي=بسجة فالسما مابعدها سجة
راكب على اللي لها فالأرض لجلاجي=حتى وهي فالسماء تسمع لها لجة
مبري راس الطويلة بري الأرواجي=اللي على شفة المزيون مدّرجة
وإخلافها ظَهْرِ حوت يْعَزل الأمواجي=عزل السماء لاعزلها الماء عن العجة
أنوارها الحمر في ليل الله الداجي=شباب رشاش رجل للشرف زجة
نادو لربط الحزام وقل الإزعاجي=يالله يالله عبدك فالسماء نجه
ويوم إستدارت شموخٍ مع تغناجي=ماكنها إلا بنية شيخِ منحرجة
ثم تلها اللي حرام تقول عرباجي=بغى يخلي لقلبي فالصدر فجة
من تلته مع طريقٍ ماش مطناجي=أرتج راسي وأشوف الناس مرتجة
حلفت بإنه مزبن واحدٍ لاجي=معنا ولكن مدري وين متوجة
يوم إعتلت قلت أنا.. مسرى ومعراجي=أحسب ذنوبي وهي تستغفر بصجة
بالله نص السريعة بير هداجي=اللي ينومسك وقت الساعه الحرجة
بالله دسم اليمين وطلق الحجاجي=نفسي ليا ضاقت بشوفته منفرجة
ماكني إلا سجينٍ جاه الإفراجي=لاجيت طيبة وجاء بن رازن ووجه
عزالله اللي ماهو للطيب سهاجي=يومٍ بعض الأوادم مالها حجة
فالأرض ولا السما ماشان منهاجي=ياكثر ماشوف هالحساد محتجة
أشوم عن كل متكبر وهلباجي=ولاتهمني كل معورّه ومعرجة
فالمجلس اللي حوى تسعين هراجي=مشايخ أنفس.. تمشيخها على الدجة