هنا .. كانت بدايات الجروح اللي تهد اجبال=هنا .. كانت نهايات السعادة في دواويني
أماري بابتسامه .. والجروح بداخلي تجتال=كما ذيك الدماء اللي .. تجوّل في شراييني
عليك الله وامانه لا تعيّـّشني بـهالموال=ترى ما عاد باقي لي زهورٍ في بساتيني
طلبتك .. لا تخلّي جال فكري يصطفق في جال=طلبتك .. ما بقى بي دمعةٍ تروي ضما عيني
ترى اقبال الزمان ادبار.. وادبار الزمان اقبال=ودورات الزّمن .. قامت علي اتكتّف يديني
وفيت.. و شحّة الغيمة..ولا عاد أمطرت بوصال=وهي كانت ليا منّي ضميت الوصل ,, تسقيني
ألا يا كثرها ذيك السوالف .. بس ماتنقال=لأنّي ما اعشق الماضي .. و هي ماعاد تعنيني
أنا لي حاجةٍ تبقى بدمي .. لو يموت الحال=ولا يمكن أخلـّـيها ولا يمكن تخلــّــيني
أنا لي عزّةٍ .. تفرض علي آقف وقوف رجال=أفضّل موتة الشامخ .. على عيش الذليليني
أنا مثل النخل .. لا من رميته بالحجر يختال=ويرمي لك ثمر فكرٍٍ تعاقَبْه السلاطيني
أنا ماني بحيّا الله.. أنا عادل ولد حوّال=ولد شيخٍ على العز .. وعلى الطالة مربيني